مصر

 أكبر انجازات السيسى فى الجيش أطعم الجنود عدس بدل الفول

اعتبر ناشطون حديث رئيس هيئة الشؤون المعنوية الأسبق اللواء سمير فرج عن أبرز إنجازات الملازم عبد الفتاح السيسي الذي خدم تحت إمرته منذ 40 سنة فضيحة من العيار الثقيل.

أكبر انجازات السيسى فى الجيش

ولم يجد اللواء الكهل سمير فرج فى حاديثه الممحون، المختلط بالبكاء والعبرات، سوى واقعة، إزالة السيسي وعدد من الجنود أثار عاصفة رملية سدت أحد الطرق، وأنه أمر بإطعام الجنود عدس بدلاً من الفول وجبنة نستو بدلاً من الجبنة البيضاء.

وقال إن العدس كفيل بأن يشعر الجنود بالدفء !!

وقال إن هذه الواقعة جعلته يتنبأ للسيسي بمستقبل باهر فى الجيش.

وفى تعليقه على الواقعة قال المستشار وليد شرابي:

ذكريات الحرب وذكريات الجبنة !!!

حظي السيئ خلاني أسمع إمبارح كلمة اللواء سمير فرج لأني من عشاق سماع ذكريات المحاربين القدماء عن حرب أكتوبر فوجدت اللواء سمير بيبدأ كلمته بطريقة شيقة جدا فيقول ” أنا هقول حاجة أول مرة احكيها وأخر مرة ،ومش هطلع اتكلم عنها في الإعلام تاني لاني عارف إن كل القنوات بعد كده حتكلمني “

وصوت الراجل قلب كانه عايز يعيط وبيحوش دموعه .

فأنا – بسذاجة – سيبت كل اللي كنت بعمله وقعدت أسمع الراجل بيقول أيه عن حرب أكتوبر لان واضح من طريقته إن في معلومات أو ذكريات أول مرة حاسمعها عن الحرب ،والموضوع مؤثر وشيق جدا ،والحقيقة اللواء عامل تشويق ( suspense ) عالي جدا .

لقيته بيقول قصة عجيبة ملهاش علاقة بالحرب ،ولا ليها علاقة بأي حاجة ،ولا ليها أي ٣٠ لازمة !!!

فقال أنه من ٤٠ سنة كان قائد الكتيبة اللي كان شغال فيها الملازم أول السيسي ومرة حصل عاصفة ترابية والطريق إتقفل فالسيسي أخد قرار انه يفتح الطريق بالليل ،وعلشان اللواء يزود جرعة ( ال suspense ) قام رامي في نص الكلام كلمة ( حقول الألغام ) وبدل ما العساكر كانوا حيفطروا جبنة بيضاء السيسي خلاهم يفطروا جبنة نستو ،وبدل ما كانوا حيكلوا فول السيسي خلاهم ياكلوا عدس ،والساعة ٦ الصبح كان السيسي والعساكر فتحوا الطريق والسيسي خرج العساكر اللي عندهم أجازات ،وحضر اللي راجعين من الأجازات .

أنا قلت لنفسي ” يااااااه أما قصة عبرة بصحيح ” .

سمير فرج

وبعدين لاقيت اللواء سمير بيقول للسيسي إنه بسبب الموقف ده كتب عنه تقرير سري بتقدير إمتياز من أربعين سنة ،وتوقع له مستقبل كبير !!!

أنا قعدت شوية باحاول أستوعب الموضوع لاني مش فاهم ايه الاكشن في إن ضابط صغير وشوية عساكر كنسوا ونضفوا طريق عليه شوية رمل !!!

لكن قطع تفكيري إن حضرات السادة الضباط اللي حاضرين إحتفالية ” ذكرى حرب أكتوبر  ” كانوا في حالة هستيريا من التصفيق الحاد على الحدوته اللي قالها سيادة اللواء .

لكن بعد ما استوعبت الموقف لاقيت عندي شوية ملاحظات على كلام اللواء 

أولا : إيه علاقة فطار العساكر اللي تم من ٤٠ سنة تحت رعاية السيسي سنة ١٩٨١ بذكرى حرب أكتوبر ؟ وهي دي المناسبة الحقيقية اللي جاي اللواء سمير يتكلم فيها .

ثانيا : كنس الطرق وتنظيفها مش من اختصاص الجيش اصلا ،وده إجراء بيتم في مصر من سنين طويلة عن طريق مجلس المدينة المختص في كل محافظة ولما بيكون في كارثة مجلس المدينة بيستعين بقوات من الشرطة تابعين للدفاع المدني .

ثالثا : لو الطريق فعلا معمول جنب حقول الغام زي ما اللواء بيقول والجيش مش محدد حقول الألغام دي بأسلاك شائكة – على الأقل – بحيث ممكن اي شوية رملة على الطريق تخلى الناس تمشي في حقول الالغام أو ماتمش تغيير خط سير الطريق علشان الناس تبعد عن حقول الألغام يبقى لازم الضباط دول يتحاكموا .

بطولة السيسي

رابعا : إيه البطولة اللي السيسي عملها في انه بدل ما العساكر كانوا حيفطروا جبنة بيضاء وفول خلاهم يفطروا جبنة نستو وعدس ؟!!! مع العلم انها حركة ممكن يعملها اي صول نبطشي مطبخ في اي وحدة .

خامسا : إيه العبقرية في إن السيسي والعساكر كنسوا الطريق بالليل – ده لو صحت الرواية – يا جماعة في بلد زي اللي انا عايش فيها التلج في الشتاء بيقفل الطرق كل شوية وعمال البلدية دايما بينضفوا الطرق الصبح وبالليل علشان الناس والعربيات يقدروا يتحركوا ،ودي حاجة عادية لان ده شغلهم مش بطولة يعني ولا حاجة .

سادسا : تبقى مصيبة فعلا لو كان الضابط ممكن ياخد تقدير في تقريره السري إمتياز لو كنس الشارع وجاب جبنه نستو وعدس للعساكر بدل الفول والجبنة البيضاء !!!

سابعا : مش عارف افهم ايه الحاجة اللي تعبت اللواء سمير وأثرت في نفسيته وهو بيحكي الحدوته اللي كان بيحكيها وخلته كل شوية يعيط ؟!!!

أمال لو كلمنا عن حرب أكتوبر حيعمل إيه؟!!!

ثامنا : عايز أنصح اللواء سمير نصيحة خالصة لوجه الله خلي بالك يا سمير لان العمر خلاص عدا لكن فاضلك لسه شوية يادوب تلحق تشتري سجادة صلاة وسبحة وتقعد تدعي ربنا يسامحك ،ولو مش عايز تشتري السجادة والسبحة وتدعي ربنا فممكن تقعد تلعب اليومين اللي فاضلين مع ( أولاد أحفادك ) أما موضوع الت***ص فإنت خلاص كبرت عليه ومش حتلحق تستفيد منه زي زمان .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى